Büttenmarsch

der K.G. Kölsche Lotterbove e.V.

von Jupp Koch, Kölner Liederdichter

Melodie: Margaretenmarsch

Vörüvver sin de Johre,

wo mer noch Köttele wore,

su löstig un em Schwung,

noh echtem kölsch Fazung.

Als Kölsche Lotterbove

do däten mer röm tobe,

Wann usjeschannt uns su en Krat,

dä kräch vun uns jesaat:,:

:,: Do wo Kölsche Lotterbove feere,

kammer sich jenöchlich ameseere.

Dröm loßt jon, noh Lotterbove Aat.

Un wann de janze Nohberschaff

och noch su drüvver schwad.

Die Kölsche Lotterbove

die muss mer mallich lovve,

denn sin se noch su fän,

sei han ehr Kölle jän.

Es Fastelovend kumme,

met Fleute un met Trumme,

dann singk dä Ahl me´m kleinste Stropp,

dat Leed verloßt üch drop:,:

:,: Do wo Kölsche Lotterbove feere,

kammer sich jenöchlich ameseere.

Dröm loßt jon, noh Lotterbove Aat.

Un wann de janze Nohberschaff

och noch su drüvver schwad.

Wo kölsche Hätze bevve,

do bliev su mäncher klevve.

Denn Kölle hät Humor,

un jeit et noch su Soor.

Dä ahle Rhing deit jringe

un all sing Nixe singe,

domet et nit verjesse weed,

dat Lotterbove Leed:,:

:,: Do wo Kölsche Lotterbove feere,

kammer sich jenöchlich ameseere.

Dröm loßt jon, noh Lotterbove Aat.

Un wann de janze Nohberschaff

och noch su drüvver schwad.